ABŞ hərbçiləri ilə dolu hərbi təyyarə İranda yerə endi

Ölkə.az "Associated Press" agentliyinə istinadən xəbər verir ki, Baqram-Dubay aviareysini həyata keçirən, "FlyDubai" aviakompaniyasına məxsus təyyarə İran üzərindən keçərkən bu ölkənin hərbi hava qüvvələrinin tələbi ilə yerə endirilib.

Vaşinqton hadisənin "bürokratik problemlərdən" qaynaqlandığını və daha sonra təyyarənin sağ-salamat Dubay aeroportunda yerə endiyini bildirib. Məlumatda təyyarənin göyərtəsində 140 nəfərin və bunlardan 100 nəfərinin ABŞ hərbçisi olduğu bildirilir.

ABŞ dövlət departamentinin mətbuat katibi Mari Harf isə bildirib ki, reysin yerinə yetirilməsində "sənədləşmə problemi" olduğundan İran tərəfi ya təyyarənin geri Əfqanıstana qayıtmasını, ya da bu ölkə ərazisində yerə enməsini tələb edib. Geri Əfqanıstana dönmək üçün təyyarənin kifayət qədər yanacağı olmadığından pilotlar onu İran ərazisində yerə endirməyə məcbur olublar. Problemlər aradan qaldırıldıqdan sonra isə təyyarə Dubaya uçub.