Daşınmaz əmlak kralları bəlli oldu
Forbes jurnalının rus versiyası Rusiya daşınmaz əmlakının krallarının reytinqini dərc edib.
Ölkə.az xəbər verir ki, böhranla əlaqədar olaraq gəlirlərinin yarıdan çoxunu itirmiş daşınmaz əmlak krallarının 2015-ci il üçün son reytinq cədvəli müəyyən edilib.
Birinci yeri həmişə olduğu kimi Azərbaycandan olan dağ yəhudiləri Zarax İliyev və Qod Nisanov tutublar. Onların nəzarətində olan daşınmaz əmlakın dəyəri milyardlarla ölçülür. "Evropeyskoe" Ticarət mərkəzi, "Radisson Royal Ukraine" hoteli, "Sadovod" ticarət yarmarkası, "Fud siti" ticarət mərkəzi, "Kiyev meydanı" ticarət mərkəzi kimi Moskvanın məşhur və ən iri ticarət mərkəzləri Qod Nisanov və Zarax İliyevin şirkətlərinə məxsusdurlar.
İkinci yeri İKEA ticarət mərkəzləri şəbəkəsinin sahibi İnqvar Kamprad tutur. Onun İKEA şəbəkəsi Rusiyanın əksər şəhərlərində filiallara malikdir. Qeyd edək ki, Kamprad erməni oliqarx Samvel Karapetyanı keçərək ikinci yerə yüksəlib.
Üçüncü yeri "Taşir" qrupunun prezidenti erməni Samvel Karapetyan tutub. Bu il onun daşınmaz əmlak icarəsindən əldə etdiyi gəlir 40% aşağı düşüb və 1,08 milyard əvəzinə o, obyektlərindən cəmi 610 milyon dollar əldə edib.
Dördüncü yeri inquş əsilli Quçeriyev qardaşları tutublar. Onların şirkətləri "Kaleydoskop" ticarət mərkəzi, "Şimali Domodedovo" və "Otel Mariott" kimi obyektlərə malikdir.
Beşinci yeri Boris Minç və Aleksandr Nesisə məxsus şirkətlər tutub. Onlar Rusiyanın bir çox böyük şəhərlərində ticarət mərkəzləri və yaşayış komplekslərinə malikdirlər.
Altıncı yeri Türkiyənin ENKA şirkəti tutur. ENKA Rusiya paytaxtında idman arenaları və yaşayış komplekslərinə malikdir.
Yeddinci yerdə həmyerlimiz, Crocus Group"un prezidenti Araz Ağalarov qərar tutur.
Səkkizinci yeri Yuri və Aleksey Xotin qardaşları tuturlar.
Doqquzuncu yeri yezidi kürd Muçoyev qardaşları tuturlar. Onlar nəhəng "Regionlar" şirkətlər qrupuna nəzarət edirlər.
Onuncu yerdə Aleksandr Klyaçinin "KR Properties" şirkəti dayanır.
