Putin 7 maddəlik "sabitlik planı"nı açıqladı

Putin Monqolustan səfərinin sonunda Ulanbator hava limanında Ukrayna Prezidenti Pyotr Poroşenko ilə telefon danışığı barədə danışıb.

Poroşenko ilə böhranın həlli məsələsində həmfikir olduqlarını bildirən Putin şərqdə sabitliyin təmini üçün ilk növbədə ordu ilə separatçıların qarşılıqlı əməliyyatları sonlandırmalarının lazım olduğunu müdafiə edib. İkinci təklifində Putin ordu birliklərinin yaşayış yerlərinə müəyyən məsafədə yerləşdirilməli olduğunu söyləyib.

Üçüncü mərhələdə atəşkəsin şərtləri üzərində tam və obyektiv beynəlxalq müşahidənin yaradılması lazım olduğunu qeyd edən Putin, dördüncü maddənin vətəndaşların yaşadığı bölgələrdə hava əməliyyatlarının dayandırılması olduğunu vurğulayıb.

Putin girovların heç bir şərt irəli sürülmədən sərbəst buraxılmalı olduğunu və humanitar yardımlara şərait yaratmağın vacib olduğunu deyib.

Rusiya lideri planın son maddəsinin Ukraynanın şərqində, qarşıdurmaların davam etdiyi bölgələrdə vətəndaşların qışa hazırlığına yardım etmək üçün ziyan görən strukturların təmir edilməsi olduğunu qeyd edib. (axar.az)

Ölkə.Az