Tramp İranla bağlı eyni vədi 37 dəfə təkrarladı

ABŞ Prezidenti Donald Tramp İranla razılaşmanın yaxın zamanda əldə olunacağını ən azı 37 dəfə açıqlayıb.

Ölkə.az xəbər verir ki, "CNN" telekanalının məlumatına görə, Tramp bu bəyanatları sosial şəbəkələrdə, ictimai çıxışlarında və KİV-ə verdiyi açıqlamalarda səsləndirib.

Telekanalın hesablamalarına əsasən, Tramp ya razılaşmanın çox yaxın olduğunu bildirib, ya da İranın belə bir sazişin imzalanmasında maraqlı olduğunu vurğulayıb.

"CNN" qeyd edir ki, bu cür açıqlamalar ilk dəfə martın 23-də səsləndirilib. Sonuncu dəfə isə iyunun 8-də ABŞ prezidenti İranla razılaşmanın iki həftə ərzində əldə oluna biləcəyini deyib.

Telekanal Trampın bu bəyanatlarına şübhə ilə yanaşaraq, onların bazarlara təsir göstərmək cəhdi və ya vəziyyətin həddindən artıq nikbin qiymətləndirilməsi ilə bağlı ola biləcəyini irəli sürüb.

Daha əvvəl tərəflər arasında mümkün razılaşma ilə bağlı bir sıra danışıqların və açıqlamaların olduğu bildirilsə də, Vaşinqton və Tehran arasında yekun razılıq hələ də əldə edilməyib.

Həmidə İbrahimova