Avropaya üçüncü istilik dalğası yaxınlaşır: Yayın ən güclüsü olacaq
Məlumata görə, ən təhlükəli dövr ənənəvi olaraq iyulun son ongünlüyü və avqustun ilk ongünlüyünə təsadüf edir. Məhz bu müddətdə uzunmüddətli və son dərəcə güclü temperatur anomaliyalarının baş vermə ehtimalı daha yüksək olur.
Nəşr bildirir ki, ekstremal istilərin ilk əlamətləri artıq Cənubi Avropada müşahidə olunur. Aralıq dənizi ölkələrində istirahət edən turistlər qeyri-adi yüksək temperatur şəraitinə uyğunlaşmağa çalışırlar. Son günlər istilərin episentri İspaniyadan İtaliyanın cənubuna keçib.
Hazırda Avropanın ən isti bölgəsi Sardiniya adasıdır. Burada kölgədə havanın temperaturu 47 dərəcəyə çatıb. Nəşr xatırladır ki, bu göstərici 2023-cü ilin iyulunda adada qeydə alınmış mütləq rekorddan cəmi 1 dərəcə aşağıdır və 2021-ci ildə Siciliya adasında qeydə alınmış Avropanın mütləq temperatur rekordu olan 48,8 dərəcəyə çox yaxındır.
Bununla belə, yaxın günlərdə İtaliya, Balkanlar və Yunanıstanda temperaturun müəyyən qədər enəcəyi gözlənilir. Lakin nəşrin vurğuladığı kimi, bu enmə nisbi xarakter daşıyacaq. Gündüz havanın temperaturu yenə də 30–35 dərəcə, gecələr isə 25 dərəcədən aşağı olmayacaq.
Məqalə müəllifləri xəbərdarlıq edirlər ki, bu müvəqqəti sərinləşmə uzun çəkməyəcək. İyulun sonu və avqustun əvvəlində sinoptik modellər daha güclü yeni isti hava dalğasının gələcəyini proqnozlaşdırır.
"Proqnozlar kölgədə temperaturun 50 dərəcəyə qədər yüksələ biləcəyini göstərir”, deyə nəşr yazır.
Ekspertlərin sözlərinə görə, belə şəraitdə birbaşa günəş şüaları altında yerləşən adi küçə termometrləri hətta ölçü hədlərini aşan göstəricilər nümayiş etdirə bilər.
Bütün bunlar bu yay Avropada yeni mütləq temperatur rekordunun qeydə alınması ehtimalını artırır. Proqnozlara əsasən, ən yüksək temperatur İspaniyanın cənubu və İtaliyada müşahidə olunacaq. Bu bölgələrdə kölgədə havanın temperaturu 50 dərəcəyə yaxınlaşa bilər.(Qaynarinfo)
