Türkiyədə 1318 otel satışa çıxarılıb

Son vaxtlar Türkiyədə baş verən terror aktları, Suriya ilə bağlı gərginlik, eləcə də bəzi digər siyasi qeyri-müəyyənliklər bu ölkənin iqtisadiyyatına böyük zərbə vurur.

Ölkə.Az lent.az-a istinadən xəbər verir ki, bu il Türkiyə təkcə turizm sektorundakı gəlirlərinin 7 milyard dollarını itirəcək. Halbuki 2014-cü ildə ölkə turizmdən 34,3 milyard, 2015-ci ildə isə 31,5 milyard dollar gəlir götürüb.

Bu il Türkiyədə sahil zonalarda yerləşən otellərə sifarişlər kəskin azalıb. Bu səbbədən də kredit borcu olan və proqnoz gəlirləri aşağı düşən yüzlərlə biznesmen obyektlərini satmaq qərarına gəlib. Egey və Aralıq dənizi sahillərində satışa çıxarılmış otellərin sayı birdən-birə 1318-ə çatıb. Mehmanxanalar arasında rusiyalı turistlərin sevimli istirahət yeri olan Antalyadakı obyektlər daha çoxdur.

İlkin hesablamalara görə, çoxu beşulduzlu olan bu otellərin ümumi dəyəri 30 milyard lirədir.

Bildirilir ki, İstanbulun Sultanəhməd meydanında almaniyalı turistləri hədəf alan və 11 alman turistin ölümünə səbəb olan terror aktı avropalıların da Türkiyəyə marağını azaldıb. Keçirilmiş sorğular da ruslarla yanaşı, alman və ingilis turistlərin Türkiyəyə narağının azaldığını göstərir.