Tarixi gün: Dünya saat 24:00-ı gözləyir

Suriyada 5 il sonra ümid işıqları yanacaq

Suriyada müharibənin başlandığı 2011-ci ilin mart ayından bu tərəfə ilk dəfə geniş miqyaslı bir atəşkəsin olması gözlənilir.

Ölkə.Az xəbər verir ki, əgər heç bir problem çıxmazsa yerli Dəməşq saatı ilə gecə yarısından (TSİ 00.00) etibarən atəşkəs razılaşması qüvvəyə minəcək.

Rusiyanın dəstəklədiyi Əsəd rejimi əldə olunan razılaşmaya əməl ediləcəyini bildirərək bəzi şərtlər irəli sürmüşdü. Səudiyyə Ərəbistanı, Türkiyə və Qətərin dəstəklədiyi müxaliflərin əsas qrupu Yüksək Müzakirə Komitəsi isə müvəqqəti atəşkəs razılığına ilkin razılığı verdiklərini açıqlayıblar.

YPG-nin nümayəndəsi Redur Xəlil "Biz YPG olaraq hazırlanmış plana böyük əhəmiyyət veririk və özünümüdafiə şərtləri çərçivəsində qarşılıq vermə haqqımızı əsas saxlayaraq, atəşkəsə tam riayət edəcəyik", - deyə qeyd edib.

Hazırlıqlar çərçivəsində Rusiyanın Suriyada yerləşən Himeymim bazasında koordinasiya mərkəzi yaradılıb.

ABŞ Prezidenti Barak Obama dünən verdiyi bəyanatda atəşkəslə bağlı olaraq bu razılaşma ilə ümidlərinin yüksək olduğunu, lakin ehtiyatlı davranılmasının gərəkliliyini deyib.

470 MİN İNSAN ÖLDÜ

Suriya Siyasət Araşdırma Mərkəzinin araşdırmasına görə, Suriya vətəndaş müharibəsində indiyədək 470 min insan ölüb, 2 milyondan çox insan yaralanıb. Bu rəqəm ölkə əhalisinin 11.5%-ni təşkil edir.

6 milyondan çox Suriyalı ölkə içində yer dəyişdirərkən, 4 milyondan çoxu xarici ölkələrə köç etmək məcburiyyətində qalıb. Suriya İnsan Haqları Monitorinq Təşkilatı isə vətəndaş müharibəsindəki can itkisini 370 min olduğunu vurğulayıb.

Ölkə.Az