Separatçılar 5 yaşlı uşağı öldürdü

Luqansk ərazisində Xryaşevato qəsəbəsi yaxınlığında qaçqınların olduğu daha bir avtomobil atəşə tutulub.

Bu haqda Ukrayna Milli Təhlükəsizlik və Müdafiə Şurasının spikeri Andrey Lisenko bildirib.

Şahidlərin sözlərinə görə, maşın böyük ağ bayrağın altında gedirmiş.

"Avtomobildə ailə beş yaşlı uşaqları ilə birgə olub. Kişi və uşaq yerindəcə həlak olub. Qadın Ukrayna hərbi həkimlərinin əllərində ölüb", - deyə mətbuat katibi Andrey Lısenko bildirib.

Ukrayna tərəfi maşının atəşə tutulmasında rusiyameyilli döyüşçüləri ittiham edir. Separatçıların nümayəndələri hələ bu ittihamlara cavab verməyib.

Qeyd edək ki, bazar ertəsi Ukraynanın Luqansk vilayətində qaçqınları aparan avtomobil karvanı da atəşə tutulmuşdu.

Ukrayna hərbçilərinin məlumatına görə, hadisə zamanı 17 nəfər dinc sakin həlak olmuşdu.

Onların əksəriyyəti açılan atəşin səbəb olduğu yanğın nəticəsində diri-diri yanıb.

Karvana ruspərəst separatçı qüvvələrin atəş açdığı iddia edilir. (anspress)

Ölkə.Az