Ölkəni ixtisar dalğası bürüdü
2016-cı ildə hər dörd şirkətdən biri işçi ştatını ixtisara salacaq.
Ölkə.az xəbər verir ki, Rusiyada aparılmış bir araşdırma nəticəsində məlum olub ki, ölkədəki şirkətlərin hər dördündən biri öz işçiləri arasında ixtisarlar aparacaq.
Araşdırmada Rusiya miqyasında iri və orta biznesə aid olan şirkətlərin 30%-nin iflasın astanasında olduğu bildirilir. İşçilərinin sayı 5 min nəfərdən çox olan şirkətlərin 63%-i vəziyyətin ağır olduğunu təsdiq edib, onlardan 40%-i isə işçilərin ixtisara salınmasını vəziyyətdən yeganə çıxış yolu kimi göstəriblər.
Araşdırmaya görə, işçilərini ixtisara salmaq niyyətində olan şirkətlərin 86%-i yerli rus şirkətləridir, onlardan 44%-i isə Moskvada yerləşir.
Xatırladırıq ki, Rusiyanın əmək və sosial müdafiə naziri Maksim Topilin 2016-cı ildə 500 min Rusiya vətəndaşını işsiz qalmaq təhlükəsi gözlədiyini bildirmişdi.
