İsrail ordusu yenidən Qəzzaya zərbələr endirdi

İsrailin atəşkəs elan edildikdən sonra Qəzzaya təşkil etdiyi hücumlar nəticəsində hamilə bir qadın, üç körpə olmaqla eyni ailədən 7 nəfər ölüb, 8 nəfər isə yaralanıb

Ölkə.Az bildirir ki, ölü və yaralıları Şuheda Əl-Aksa ( Əl-Aksa Şəhidləri)  xəstəxanasına gətirildiyini xəbər verən Fələstin Səhiyyə Nazirliyinin nümayəndəsi professor Əşrəf əl-Kudra, ölənlərin adlarını açıqlayıb. Onların bətnində körpəsi olan Nəbilə əl-Luh (35), Rafet əl-Luh (32), uşaqları Musatafa, Fərah, Meysera ilə Məhəmməd əl-Luh(21) olduğu açıqlanıb.

Beləliklə İsrail ordusunun dünən axşam saatlarında təşkil etdiyi hücumda ümumilikdə 9 nəfər ölüb, 61 nəfər isə yaralanıb.

İsrail illərdir mühasirə altında saxladığı Qəzzaya iyulun 7-də havadan və dənizdən, iyulun 17-si isə qurudan hücuma başlamışdı.

Bir aydan çox davam edən hücumlardan sonra Misirdə baş tutan müzakirələrdə müvəqqəti atəşkəs qərarı verildi.

Ancaq bu dəfə də Qəzzadan öz ərazisinə raket atıldığını iddia edən İsrail yenidən hücuma başlayıb. HAMAS nümayəndəsi Sami Əbu Zühri isə bu iddiaların yalan olduğunu bildirib.

Gülnar Hüseyin

Ölkə.Az