Ankara terrorunu kim törədib?
Türkiyə hüquq-mühafizə orqanlarının terror aktı törədilmiş ərazidə apardığı ekspertiza nəticəsində terrorçuların neçə nəfər olduğu məlum olub.
Ölkə.az xəbər verir ki, hadisə yerində aparılan ekspertiza nəticəsində məlum olub ki, partlayan maşında biri qadın, biri kişi 2 terrorçu olub.
Maşının isə 2016-cı ilin 10 yanvar tarixində oğurlanmış bir avtomobil olduğu ortaya çıxıb.
Xatırladırıq ki, ABŞ-ın Ankara səfirliyinin 2 gün əvvəl öz "Twitter" hesabında yaydığı mesajda Türkiyə paytaxtında bir terror aktının baş verə biləcəyi və terror aktını biri dağıstanlı qadın və suriyalı gənc oğlanın törədəcəyi ehtimalı olduğu bildirilmişdi. Bu iddia isə terrorda şübhələrin Suriya və Rusiya üzərinə yönəldiyini göstərir.
Hazırda Baş nazir Davudoğlu tərəfindən təyin olunmuş geniş tərkibli istintaq komissiyası hadisəni araşdırmaqla məşğuldur.
