5 yaşlı uşaq anasını xilas etdi
5 yaşlı uşaq anasını boğulub ölməkdən xilas etdi.
Ölkə.Az Atv Xəbər-ə istinadən bildirir ki, izləyənləri dəhşətə gətirən kadrlar Amerikanın Texas ştatında lentə alınıb. Hovuzda üzən anasının hərəkət etmədiyini görən azyaşlı övladı onu ölümdən son anda xilas edib.
Portlend şəhərində yaşayan Treysi Enderuald adlı qadın hovuzda üzərkən huşunu itirib. Huşsuz şəkildə suya qərq olan Treysinin 5 yaşlı qızı Alison baş verənlərdən şübhələnərək anasının yanına qaçıb. Onu dartaraq hovuzun kənarına çəkən uşaq, üzüstə suda qalan qadını fırladaraq başını havaya çevirib.
Uşağın qaçaraq ətrafdakıları köməyə çağırması, ölümlə üz-üzə qalan qadının bu cür həyata qayıtması müşahidə kamerasından anbaan lentə alınıb. Hadisə ölkədə ciddi rezonans yaradıb.
Həkimlər gözlərini xəstəxanada açan Treysinin möcüzə nəticəsində sağ qaldığını təsdiqləyib. Onların sözlərinə görə, amerikalı qadın suda bir az da qalsaydı, dünyasını dəyişəcəkdi.