Şimali Koreya Obamanı video ilə hədələdi
Şimali Koreya Amerika Birləşmiş Ştatlarını bu dəfə "Son şans" adlı video ilə tədid edib.
Videoda görünür ki, nüvə başlıqlı raket yer kürəsini dövrə vurduqdan sonra Birləşmiş Ştatların paytaxtı Vaşinqtona düşür.
Paytaxt partladıldıqdan sonra Koreya dilində bir mesaj verilir: "Əgər amerikalı imperiyalistlər bizə doğru bir santimetr hərəkət etsələr, onları dərhal nüvə silahları ilə vuracağıq".
İki gün bundan əvvəl isə amerikalı ekspertlər bəyan etmişdilər ki, Şimali Koreya hökuməti miniatürləşdirilmiş nüvə başlıqlarına malikdir. Ekspertlər hesab edir ki, bu, özünü dünya ölkələrinin əksəriyyətindən təcrid edən Şimali Koreya hökumətinin nüvə silahı texnolgoiyasında hansı səviyyəyə çatdığını göstərir.
Şimali Koreya lideri Kim Çen In ötən həftə ballistik raketlərin Amerika Birləşmiş Ştatlarını vurmaq qabiliyyətinə malik olduğunu bildirmişdi. Onun bu iddiaları Amerika kəşfiyyatını kifayət qədər məşğul edib.
Kəşfiyyatçılar Şimali Koreyanın hansı cəbhələrdə irəliləyiş əldə etdiklərini müəyyən etməyə çalışırlar. Kim Çen Inın fotoşəkillərindən birində onun miniatürləşdirilmiş nüvə başlığı yanında dayandığı iddia olunur. Ekspertlər bu fotoşəkil üzərində də araşdırma aparıblar.
Tez-tez hidrogen bombasını sınaqdan keçirən Kim Çen In martın əvvəllərində ABŞ-ı da hədələyib. O, rəsmi Vaşinqtonu Manhettenə hidrogen bombası atmaqla hədələyib.
"Şimali Koreya uzaq mənzilli raket vasitəsi ilə hidrogen bombasını Manhettenə atacağı təqdirdə burada yaşayan hər kəs bir anda öləcək və şəhər tamamilə yanıb kül olacaq" - Şimali Koreya lideri bəyan edib.
