Suriyadakı rus bombardmanlarında nə qədər dinc sakin ölüb?
Rusiyanın 2015-ci ilin sentyabr ayından Suriyada başladığı hərbi əməliyyatlar zamanı ölən dinc sakinlərin sayı açıqlanıb.
Ölkə.az xəbər verir ki, "Airwars Monitoring Group" (Aviasiya müharibələrinin monitorinqi qrupu) araşdırma mərkəzinin əməkdaşları rus aviasiyasının bombardmanları nəticəsində Suriyada nə qədər dinc vətəndaşın öldüyünü araşdırıb.
Qrupun məlumatına görə, araşdırmalar əməliyyatların başladığı 2015-ci ilin 30 sentyabr - 31 dekabr tarixləri arası dövrü əhatə edir.
Qrupun araşdırmaçılarının verdiyi məlumata görə, rus aviasiyasının bombardmanları nəticəsində 1098 nəfərdən 1450 nəfərə qədər dinc suriyalı həyatını itirib. Rusiyanın bombardmanları nəticəsində 1700 nəfər isə yaralanıb.
Ekspertlərin fikrincə bombardmanların ilk 3 ayında Suriyada bu qədər insan ölübsə, o zaman növbəti 3 ay ərzində ölənlərin sayı bundan təxminən 3 dəfə çoxdur. Ekspertlər gəldikləri nəticəni 2016-cı ildən başlayaraq bombardmanların daha da şiddətləndiyi və zərbələrin artıq şəhər mərkəzlərinə və yaşayış məntəqələrinə endirildiyi ilə əsaslandırırlar.
