Ərdoğan İhsanoğlunun daha bir səhvini düzəltdi

Türkiyənin Baş naziri Rəcəb Tayyib Ərdoğan İstanbulda öz tərəfdarları qarşısında çıxış edərkən, növbəti dəfə müxalifətin prezidentliyə namizədi Ekmələddin İhsanoğlunun bostanına daş atıb. 

Onun sözlərinə görə, müxalifət bu cür namizəd seçməyinə artıq peşman olub və İhsanoğlunun professor olmasının və 3 dil bilməsinin ona heç bir faydası yoxdur.

"Biz tərcüməçi axtarırıq yoxsa ölkəni idarə edəcək adam axtarırıq? Biz bunların millətçiliklərini ortaya çıxardıqları ortaq namizədlərində gördük. Guya professordur, guya 3 dil bilirmiş, tərcüməçi axtarırıq yoxsa ölkəni idarə etməyə adam axtarırıq? Nəymiş, atası mərhum Məhmət Akifin dostu imiş. Atan çox möhtərəm bir insandır, amma bunun sənə bir faydası yoxdur".

Ərdoğan həmçinin Ramazan bayramı zamanı Ekmələddin İhsanoğlunun tərəfdarları qarşısında çıxışında işlətdiyi ifadə ilə bağlı da danışıb. İhsanoğlunun "Süleymaniyədə bayram namazı" adlı şeirə istinad gətirməsinə münasibət bildirən Ərdoğan deyib ki, "Süleymaniyədə bayram namazı" adlı bir şeir yoxdur, "Süleymaniyədə bayram sabahı" adlı şeir var və İhsanoğlu guya özünü ədəbiyyatçı və savadlı adam kimi göstərir./anspress/

Ölkə.Az