Davudoğlunun kreslosuna kim əyləşəcək?
Türkiyə prezidenti Ərdoğanla baş nazir Davudoğlu arasında baş tutmuş dünən gecəki görüşdən sonra AKP-nin Konqresinin ən gec 5 iyun tarixində baş tutacağı bildirildi.
Ölkə.Az türk mediasına istinadən xəbər verir ki, artıq partiya daxilində Davudoğlunun yerinə potensial namizədlərin kim olacağı haqda təlaş var. Yuxarı səviyyədə Əhməd Davudoğlunu kimin əvəz edəcəyi bilinsə də, ictimaiyyət arasında bu barədə müxtəlif söz söhbətlər gəzməkdədir.
Türkiyədəki ən tanınmış siyasi icmalçılar artıq bir neçə namizədin adını çəkiblər. Türk mediasına sızan məlumatlarda hələlik kimin yüz faiz Əhməd Davudoğlunun yerini tutacağı deyilməsə də, onun potensial xələflərinin adları çəkilir.
Məlumata görə, Davudoğlunun yerinə AKP-nin sədri və baş nazir postlarına böyük ehtimalla hazırkı rabitə və nəqliyyat naziri Binali İldırım, Ərdoğanın kürəkəni və enerji naziri Berat Albayrak, ədliyyə naziri Bəkir Bozdağ, səhiyyə naziri Mehmet Müzəffəroğlu və baş nazirin müavini Numan Kurtulmuş, yəni bu siyasətçilərdən biri yiyələnə bilər.
Hələlik isə AKP-də fövqəladə Konqresə hazırlıq gedir.
