Milyarder övladlarını vərəsəlik hüququndan məhrum etdi
Milyarder Fridman əmlakını öz uşaqlarına verməkdən imtina edib
"Alfa-Qrup"un sahiblərindən biri olan Mixail Fridman öz əmlakının demək olar ki hamısını xeyriyyə işlərinə yönəltmək haqqında qərar verib.
Milyarderin sözlərinə görə, onun biznes üzrə tərəfdaşları da belə qərar qəbul ediblər. Əmlakını uşaqlarına verməyəcəyi barədə qərarını Milyader Mixail Fridman mayın 19-da "Forbes Club"un iclasında açıqlayıb.
Biznesmen qeyd edib ki, uşaqlara külli miqdarda pul miras qoymaq onun uşaqları üçün edəcəyi ən pis hərəkət ola bilərdi.
"Mən cəmiyyət qarşısında belə vədlər verməyin həvəskarı deyiləm, lakin deyə bilərəm ki, qərar qəbul etmişəm- mənim bütün varidatım xeyriyyə məqsədi ilə istifadə olunacaq. Öz uşaqlarım üçün edəcəyim ən pis hərəkət onlara külli miqdarda pul miras qoymağım olardı",- deyə Fridman zaldan verilən sualı cavablandırıb. O həmçinin qeyd edib ki, uşaqlarını "Alfa-Qrup"un biznesində iştirak etməyə cəlb etmək niyyətində deyil.
Milyarder övladlarının da onun kimi həyatda sərbəst şəkildə peşəkar uğurlar qazanacağına əmin olduğunu bildirib. Bundan əlavə, Fridman övladlarının bəd niyyətli insanların diqqət obyektinə çevrilmələrini istəmədiyini bildirib.
Mixail Fridmanın 4 övladı var: qızları Lora Fridman (1993-cü ildə anadan olub), Katya Fridman (1996-cı ildə anadan olub), Nika Ojelskaya (2006-cı ildə anadan olub) və oğlu Aleksandr Ojelski (2000-ci ildə anadan olub).
"Forbes" jurnalının 2016-cı il versiyasına əsasən onların hamısı rusiyalı milyarderlərin ən varlı varisləri reytinqində ilk onluqda yer alırlar. Onların hər birinin payına $3,3 mlrd. düşür. Fridmanın "Alfa-Qrup" üzrə tərəfdaşı Aleksey Kuzmiçevin (oğlu Aleksis), German Xanının (iki qız və iki oğlan), Pyotr Avenin (oğlan və qız) uşaqları ən varlı varislər reytinqində müvafiq olaraq 4-cü, 17-ci, 19-cu yerləri tuturlar.
Daha öncə, "Forbes"in siyahısında olan başqa bir milyarder, "İnterros" Holdinqin prezidenti və "Norilski nikeli" Dağ Metal Kompleksinin ("Norilskiy Nikel" DMK) baş direktoru Vladimir Potanin də öz varidatını xeyriyyə işlərinə yönəltmək planları barədə açıqlama vermişdi. "Mənim kapitalım cəmiyyətin xeyrinə sərf edilməli və sosial məqsədlərə xidmət etməlidir",- deyən sahibkar əlavə etmişdi -"Mənim uşaqlarım böyüyəcək, onların atası milyarderdir, tanınmış insandır. Birincisi, onlar mənim kölgəmdədirlər, ikincisi, onların həyatda nəyəsə nail olmaq üçün heç bir stimulu olmayacaq. Buna görə də mən, Geyts və Baffet kimi hərəkət edəcəm",- deyə Potanin "Financial Times"ə müsahibəsində bildirib. 2016-cı ildə "Forbes" jurnalı Potaninin əmlakını $12,1 mlrd. dəyərində qiymətləndirib.
Skolkovo Biznes Məktəbinin Rifah və Filantropiya İdarəetmə Mərkəzinin tədqiqatları göstərib ki, rusiyalı biznesmenlərin yalnız 48%-i əmlaklarının hamısını öz övladlarına miras qoyur, 36% əmlakın yarıdan çoxunu, 13% yarıdan azını miras qoyur. Biznesmenlər övladlarına miras qoymadıqları pullarını xeyriyyə işlərinə sərf etməyi düşünürlər.
İlhamə
Ölkə.Az
