Gürcüstanda NATO-nun ilk rotası yaradıldı

Gürcüstanda Şimali Atlantika Alyansının ilk sertifikatlaşmış rotası yaradılıb.

Bu barədə Ölkə.Az "RİA Novosti" agentliyinə istinadən məlumat verir.

"Əgər ehtiyac yaranarsa bu rota NATO-nun təcili reaksiya qüvvələri tərəfindən istifadə olunacaq", Gürcüstanın Müdafiə Nazirliyində jurnalistlərə belə deyiblər.

"Təqdim edilən rota 2015-ci ildən NATO çevik qüvvələri tərkibində müxtəlif tədbirlərdə, o cümlədən NATO-nun təşəbbüsü ilə keçirilən beynəlxalq təlimlərdə iştirak edib. Bu gün sertifikatlaşmanın formal tərəfi başa çatdırıldı. Sözügedən rota daxili qiymətləndirmədən, o cümlədən NATO-nun qiymətləndirməsindən keçdi. Əgər alyans lazım bilərsə, rota NATO-nun istənilən əməliyyatlarında iştirak etmək üçün döyüş hazırlığı vəziyyətindədir",- deyə Gürcüstan Hərbi Qüvvələri Baş Qərargahının rəis müavini Omar Beqoidze bildirib.

Gürcüstan Hərbi Qüvvələrinin Baş Qərargahında NATO nümayəndələri ilə müvafiq sənəd imzalanıb. Rotanın yekun göstərici təlimləri Tbilisi yaxınlığında Vaziani poliqonunda baş tutub. Təlimlərdə müxtəlif hərbi texnika və silahlardan istifadə olunub.

"Çox yaxşı xəbər var... Bu gündən bizim NATO rotamız var", Gürcüstanın müdafiə naziri Tina Xidaşeli öz "Facebook" səhifəsində belə yazıb.

İlhamə
Ölkə.Az