Türkiyədən ABŞ-a çox sərt cavab

Türkiyənin XİN başçısı ABŞ hərbçilərinin geyimində YPG nişanının olmasını tənqid edib

"Hərbçilərin terrorçu nişanlarından istifadə etməsi yolverilməzdir. Özünü Türkiyənin müttəfiqi kimi göstərən və terrorçuluqla mübarizəyə hazır olduğunu bildirən ölkənin hərbçiləri uniformalarında terror təşkilatının nişanını daşımamalıdırlar. Bu ikiüzlülükdür və yolverilməz haldır".

Ölkə.Az xəbər verir ki, bu bəyanatı Türkiyənin Xarici İşlər Naziri Mövlud Çavuşoğlu verib.

"Onlara ( ABŞ-a) Suriyanın digər regionlarına gedərkən İŞİD, Ən-Nsra, Əl-Qaidə, Afrikaya gedərkən Boko Haram terror təşkilatlarının nişanlarını taxmamağı tövsiyə edirik",- deyə türkiyəli nazir əlavə edib.

Qeyd edək ki, Amerika hərbçilərinin uniformalarında YPG (PKK-nın Suriya qanadı) nişanı olması barədə xəbərlər və fotoşəkillər yayılmışdı. Pentaqon nümayəndəsi Piter Kuk hadisəylə bağlı şərh vermək istəməyərək yalnız onu qeyd edib ki, ABŞ hərbçiləri əvvəllər də müttəfiqlərinin emblemlərindən istifadə ediblər.

İlhamə
Ölkə.Az