Ay ərzində Suriyada 872 nəfər həlak olub

Ölənlərin üçdə biri qadın və uşaqlardır

Ölkə.Az Anadolu Agentliyinə istinadən məlumat verir ki, ay ərzində Suriya ərazisində 872 mülki şəxs Bəşər Əsəd və onun müttəfiqlərinin, eləcə də terrorçuların qurbanı olub. Bu göstərici SHHR təşkilatının hazırladığı hesabatda öz əksini tapıb.

Hesabatda qeyd edilir ki, ölənlərin 33%-i qadın və uşaqlardır. Həlak olanların 57%-i Bəşər Əsəd rejiminin hücumunun qurbanları olub.

Bəşər Əsəd rejiminin hücumları nəticəsində 498 mülki şəxs, o cümlədən, 73 qadın, 89 uşaq həlak olub. Ölənlərin 46-sı işgəncə nəticəsində həyatını itirib.

Rusiya Hərbi Hava Qüvvələrinin Suriyaya zərbələri nəticəsində 49 nəfər, o cümlədən 6 qadın, 15 uşaq həlak olub. 6 mülki şəxs PYD terror təşkilatının, 178 dinc sakin, o cümlədən, 38 qadın, 21 uşaq İŞİD terrorçularının qurbanı olub.

"Ən-Nusra Cəbhəsi" təşkilatının keçirdiyi döyüşlərdə 5, müxalifətçi qruplaşmaların əməliyyatları nəticəsində 91, ABŞ başda olmaqla beynəlxalq koalisiyanın keçirdiyi əməliyyatlar nəticəsində 15 nəfər dinc sakin ölüb.

İlhamə
Ölkə.Az