"İsrail Fələstin dövlətini tanısa, Nazirlər Kabinetini dağıdacağıq"

İsrailin baş naziri Benyamin Netanyahunun əsas koalisiya tərəfdaşlarından biri, "Yəhudi evi" partiyasının lideri Naftali Bennet Fələstin dövlətinin yaradılacağı təqdirdə hökuməti dağıdacağını bəyan edib.

Ölkə.Az xəbər verir ki, o, baş nazir Benyamin Netanyahu və müdafiə naziri Aviqador Libermanın ərəb qonşularla münasibətləri yaxşılaşdırmaq üçün bu günlərdə verdiyi bəyanatlara cavab olaraq belə bir fikir səsləndirib.

"Nə qədər ki, biz burdayıq, Fələstin dövləti yaradılmayacaq. Biz tarixi səhvin buraxılmaması üçün divar kimi dayanacağıq. Əgər söhbət 1967-ci ildə yaradılmış sərhədlərdən və Qüdsün parçalanmasından gedərsə, biz yalnız hökumətdən getməklə qalmayacağıq, biz hökuməti dağıdacağıq",- deyə Bennet yerli kanallardan birinə müsahibəsində bildirib.

İlhamə
Ölkə.Az