Erməni keşişi Ərdoğandan üzr istədi

Arxiyepiskop Ateşyan: Erməni ideoloqlar necə ki, bir vaxtlar Azərbaycanda yaşayan erməniləri bu mehriban və xeyirxah xalqla münaqişəyə sürüklədilər, indi də ermənilərə Türkiyədə rahat yaşamağa imkan verməyəcəklər

Sağlam düşünmək qabiliyyətini itirməmiş bir qrup erməni Bundestaqın "erməni soyqrımını" tanımaq qərarına daha adekvat reaksiya göstərməyi bacarıblar.

Ölkə.Az erməni KİV-lərinə istinadən xəbər verir ki, Erməni Apostol Kilsəsinin Konstantinopol patriarxının naibi, arxiyepiskop Aram Ateşyan Türkiyə Prezidenti Rəcəb Tayyib Ərdoğana məktub göndərib. O, məktubunda Almaniya Bundestaqının erməni soyqırımını tanıması faktından təəssüfləndiyini bildirib.

"Bundestaqın qərarı xalqımızda təəssüf hissi yaratdı. Türkiyədə yaşayan erməni icması olaraq biz səmimiyyətlə təəssüfləndiyimizi bildiririk.

O, məktubunda özünün Türkiyə qarşısında öhdəliklərini yerinə yetirdiyini bildirərək, Türkiyə vətəndaşı olan xristian ermənilərin də hisslərini ifadə edib. Bundestaqın qərarının Almaniya vətəndaşlarının fikirlərini nə dərəcədə əks etdirməsinin aydın olmadığını yazıb.

"Erməni xalqını yaralayan bu faciənin beynəlxalq siyasətdə alət kimi istifadə olunması xoşagəlməz vəziyyətdir. Bu qətnamə və buna bənzər digər sənədlər bizə zərbə vurur.

Təəssüf ki, erməni xalqının tarixi acılarından Türkiyə dövlətini və xalqını cəzalandırmaq üçün istifadə edirlər... Əgər belə getsə erməni ideoloqlar ermənilərə Türkiyədə rahat və sakit yaşamağa imkan verməyəcəklər. Necə ki, bir vaxtlar Azərbaycanda yaşayan ermənilərə imkan vermədilər. Onlar erməniləri bizə qarşı hər zaman xeyirxah, diqqətli və qayğıkeş münasibət göstərən xalqla (azərbaycanlılarla) münaqişəyə sürüklədilər.",- deyə keşiş yazıb.

İlhamə
Ölkə.Az