Suçiçəyi gürcü əsgərlərinə NATO təlimlərində iştirak etməyə imkan vermədi

Gürcüstan əsgərləri suçiçəyinə yoluxduqlarına görə NATO təlimlərinə qatılmayıblar

Ölkə.Az "RİA Novosti" agentliyinə istinadən məlumat verir ki, Polşa Gürcüstandan NATO təlimlərinə qatılmamasına görə rəsmi izahat tələb edib.

"Gürcüstan hərbi bölmələri NATO-nun Polşada keçiriləcək "Anakonda 16" adlı təlimlərində iştirak etmək üçün dəvət almışdılar. Lakin gürcülər təlimdə iştirak etmədilər. Biz bunun səbəbləri barədə rəsmi açıqlama gözləyirik",- deyə Polşa silahlı qüvvələrinin mətbuat katibi Pyotr Valek bildirib.

Bundan öncə isə "Gürcüstan onlayn" saytında gürcü hərbçilərin "Anakonda 16" təlimlərinə qatılmaması barədə maraqlı açıqlama verilmişdi. Məlumatda qeyd edilirdi ki, 12-ci piyada batalyonunun üçüncü rotası təlimlərə getməmişdən öncə hərbçilərin ikisində yoluxucu su çiçəyi virusu aşkarlanıb. Onlar bu xəstəliyə evdə uşaqlarından yoluxublar.

Polşada NATO təlimləri iyunun 17-nə qədər davam edəcək. Təlimlərdə 23 ölkədən 30 min əsgər iştirak edəcək.

İlhamə
Ölkə.Az