Donald Tramp Obamanı istefa verməyə çağırıb

Ölkə.Az "BBC"-yə istinadən məlumat verir ki, Respublikaçılar Partiyasından ABŞ prezidentliyinə yeganə namizəd, milyarder Donald Tramp Barak Obamanı Floridada gey klubda törədilmiş terror aktından sonra istefa verməyə çağırıb.

Siyasətçi bu bəyanatı öz saytında yerləşdirib.

Tramp ölən və yaralanların ailəsinə başsağlıqı verib və bu terror aktının 2001-ci il sentyabrın 11-də baş vermiş faciədən sonra ən pis hadisə adlandırıb.

O, bildirib ki, "Amerika xalqı radikal islamçıların hücumuna məruz qaldığı bir vaxtda Obama öz çıxışında "radikal islam" sözünü işlətməkdən imtina edib. Təkcə bu səbəbə görə o istefa verməlidir".

Tramp öz bəyanatında Hillari Klintonu da unutmayıb: "Hillari Klinton da bu hadisəni törədənlərin radikal islamçılar olduğunu söyləməyə çəkinirsə, prezident seçilə bilməz, o bu mübarizədən çəkilməlidir".

İlhamə
Ölkə.Az