Atatürk Hava Limanında qanlı partlayışları təşkil edən terrorçu çeçen imiş...

İstanbulun Atatürk hava limanında törədilmiş terror aktı ilə bağlı yeni təfərrüatlar üzə çıxır. İddialara görə, terror aktını təşkil edən və polislər tərəfindən "ilanın başı" kimi qiymətləndirilən terrorçu çeçen əsilli Əhməd Çatayevdir. 

Ölkə.az  Türkiyə KİV-lərinə istinadən xəbər verir ki, Sultanəhməd və Taksimdə törədilən terror aktlarının təşkilatçısı barədə təkzibedilməz faktlar əldə edilib. Həmin faktlara görə terror hadisələri İŞİD təşkilatında İstanbul üzrə səlahiyyətli şəxs hesab edilən Əhməd Çatayev əsas şübhəlidir.

Əldə olunan məlumatlara görə, terrorçular may ayında 5 nəfərlik qrup şəklində Suriyanın Rakka şəhərindən Türkiyəyə gəliblər. Təşkilatın xüsusi birliklərində təlim keçən 3 canlı bomba İstanbulun Pendik və Baxçalı rayonlarında İŞİD-ə məxsus evlərdə qalaraq terror planı hazırlayıblar. Hadisə baş verən gün onlar təşkilatın Fatihdə yerləşən mənzillərindən birindən özləri üçün hazırlanmış bombalı jiletləri və silahları alaraq yola çıxıblar.

Bu 3 canlı bombaya hücum planı və silahları verən təşkilatçının isə məhz yuxarıda adı qeyd edilən Əhməd Çatayev olduğu iddia edilir. Əhmət Çatayev 2000-ci illərdə Rusiyada həbsdə olarkən qanqrena səbəbi ilə bir qolu kəsildiyinə görə "tək qol" ləqəbi ilə tanınır. 2003-cü ildə həbsxanadan qaçıb. Əhməd Çatayev İŞİD-ə qoşulmazdan əvvəl çeçen terrorçu Doku Umarovun sağ əli olub.

Xatırladaq ki, İstanbul polisi dünən İŞİD-ə qarşı Pendik, Eyyup və Başakşəhərdə əməliyyatlar həyata keçirərək terror aktında əli olmaqda şübhəli bilinən 13 nəfəri ələ keçirib. Axtarış aparılan ünvanlardan çoxlu sayda silah, elektron materiallar, kompüter və telefonlar müsadirə olunub.

Ölkə.Az