Ərdoğan suriyalı qaçqınlara vətəndaşlıq verəcək
Türkiyə prezidenti Rəcəb Tayyip Ərdoğan Suriya qaçqınlarına vətəndaşlıq verəcəyini bəyan edib.
Ölkə.Az Türkiyə mediasına istinadən xəbər verir ki, Ərdoğan bu barədə ölkənin cənubunda yerləşən Kilis şəhərində etdiyi çıxışında deyib. İndi bu şəhərin əhalisi qaçqınların hesabına iki dəfə artıb.
“Bu gecə mən qardaş və bacılara yaxşı bir xəbər vermək istəyirəm. Mən inanıram ki, qardaş və bacılarımızın arasında Türkiyə Respublikasının vətənadaşı olmaq istəyənlər var. Türkiyə sizin evinizdir”,- deyə dövlət başçısı bildirib.
Ərdoğan bu təklifin hazırda Türkiyəyə sığınmış 2,7 milyon suriyalının hamısına aid olub-olmadığını dəqiqləşdirməyib.
Bundan əvvəl Türkiyə bəyan etmişdi ki, əgər iş sahibləri xərcləri öz üzərlərinə götürsələr, iş tapan suriyalılara əməkçi icazəsi veriləcək.
Türkiyə hökumətinin bir rəsmisi bildirib ki, prezidentin təklifi hələlik niyyətdir və hökumət bu istiqamətdə müəyyən işlər görür.
Prezidentin qaçqınlara bu vədi nəinki ölkə daxilində ictimai fikri haçalaya, hətta Brüssellə Ankara arasında miqrant sazişinin icrasını mürəkkəbləşdirə bilər.
İlhamə
