\"Həmin toplantıda Fəthullahçı terror təşkilatına bağlı bütün komandirlər vəzifədən azad edilcəkdi\"

Türkiyədə hərbi çevrilişə cəhddən dərhal sonra prezident və baş nazir xalqı küçələrə səslədi

Türkiyənin əsas müxalif partiyaları CHP və MHP başqanları da hakimiyyətin yanında olduğunu bəyan etdi və hakimiyyətə dəstək verəcəyini bildirdi. Bunun ardınca küçələrə çıxan xalq əsgərlərin üzərinə yeridilər. Xalqın ayağa qalxması ilə hərbi çevrilişə cəhdin qarşısı alındı.

Hazırda Ankarada insanlar küçələrə çıxaraq sivil hakimiyyətə dəstək nümayiş etdirir.

Diriliş Başkanları Təşkilatının Ankara vilayəti üzrə rəhbəri Seyfəddin Boğazlı baş verən hadisələr və Ankaradakı vəziyyətlə bağlı Ölkə.Az-a açıqlama verib:

"Türkiyədə Fətullahçı terror təşkilatının hakimiyyət çevrilişi boşa çıxdı. Türkiyə ordusunun bəzi zabitləri Türkiyədə demokratiya və insan haqlarına qarşı çıxdılar. Hərbi çevrilişin əziyyətlərini dəfələrlə yaşayan bu millət bir neçə hərbçiyə yenidən bunu etməyə imkan verməzdi. Xalqımız demokratiyaya sahib çıxaraq hərbi çevrilişin olmasını əngəllədi. Fətullah Gülənə bağlı terror təşkilatının ələ keçirdiyi hava limanları, körpülər, dövlət binaları geri alındı. TRT binasını və CNN Türk telekanallarını ələ keçirən hərbçilərdən geri aldıq.

Pensilvaniyadan əmr alıb, hərbi çevriliş etmək istəyən 40-a yaxın zabitin etmək istədiyi uğursuz oldu. 15 iyulun seçilməsi də təsadüfi deyil. Ona görə ki, gələn ay Türkiyənin Hərbi Şurasının toplantısı keçiriləcəkdi. Həmin toplantıda "Paralel dövlət"ə bağlı bütün komandirlər vəzifəsindən azad edilcəkdi.

Fətullah Gülənə bağlı olan zabitlər TBMM-nin binasını bombaladılar. Tarixdə ilk dəfə Atatürk və silahdaşlarının qurduğu TBMM-i bombalandı, özü də əsgərlər tərəfindən. Bundan əlavə Milli İstihbarat Təşkilatı, Boğaziçi və Fatih Sultan Mehmet körpüsü atəşə tutuldu. TRT və Türksat ələ keçirildi, prezident Rəcəb Tayyib Ərdoğanın qaldığı otel havadan və yerdən bombalandı.

Hərbi çevrilişə cəhd bir gecədə onlarla insanın həyatını itirməsi ilə nəticələndi. Xalqımız tankların, hərbi çevriliş etmək istəyənlərin qarşısına çıxdı və qazandı.

Hazırda Ankarada istər CHP, MHP istərsə də AK Partiyalı olsun, hamısı bir arada hərbi çevrilişə qarşı çıxıb. Hər kəs ayaqdadır. Hərbi çevrilişə qarşıyıq".

Səxavət Məmməd
Ölkə.Az