Fələstin lideri Britaniyanı məhkəməyə verir

Ölkə.Az Rusiya KİV-lərinə istinadən xəbər verir ki, Fələstin lideri Mahmud Abbas Böyük Britaniyanı İsrail dövlətinin yaradılmasına görə beynəlxalq məhkəməyə verməyə hazırlaşır.

Bu barədə Fələstinin xarici işlər naziri Riyad Əl Maliki Ərəb dövlətləri Liqasının sammitində məlumat verib.

Fələstin lideri Böyük Britaniyanı 1917-ci ildə Balfur bəyannaməsini dərc etməkdə və İsrailin cinayətlərini dəstəkləməkdə itiham edir. Mahmud Abbasın sözlərinə görə Böyük Britaniya yəhudilərin fələstinlilərin ata-babalarının yurdunda məskunlaşmasına səbəb olmuş məsuliyyətsiz vədlərə görə məsuldur.

İsrail tərəfi artıq Fələstinin bəyanatını cavablandırıb. İsrailin baş naziri Benyamin Netanyahu bu iddianın uğursuz olacağını söyləyərək bunun fələstinlilərin İsrail dövlətini tanımamaq arzusundan başqa bir şey olmadığını söyləyib.

Balfur qətnaməsi 1917-ci il noyabrın 2-də Britaniyanın xarici işlər naziri Artur Balfur tərəfindən lord Volter Rotşildə göndərilərək Fələstində yəhudilər üçün milli ocağın yaradılması ideyalarını əks etdirib. Qısa müddətdə bu ideya Fransa, İtaliya və ABŞ tərəfindən dəstəklənib.

İlhamə
Ölkə.Az