PKK Romada Türkiyənin müşavirliyinə hücum edib

Ölkə.Az  Anadolu agentliyinə istinadən xəbər verir ki, səhər saatlarında 20 nəfərlik PKK qrupu Türkiyənin Romadakı turizm müşavirliyinin binasına hücum edib.

Əldə edilən məlumata görə, İtaliyanın paytaxtında yerləşən Mədəniyyət və Turizm Müşavirliyinin binası qarşısında səhər saatlarında Kobanidəki (Ayn Əl Ərəb) hadisələrlə əlaqədar nümayiş təşkil edilib. PKK-ya mənsub təxminən 20 nəfərlik qrupu müşavirlik binası qarşısında dinc keçən nümayişi şiddətləndirib. 

Qrupun üzvlərinin müşavirliyin binasının şüşələrinə boyalarla müxtəlif şüarlar yazdıqları, binaya sis bombaları və ət parçaları atdıqları bildirilib. Hərəkətin təxminən 10 dəqiqə davam etdiyi, müşavirlik işçilərinin hadisə barədə Romanın təhlükəsizlik orqanlarına məlumat verdiyi deyilib.

PKK qrupunun üzvləri təhlükəsizlik qüvvələri hadisə yerinə gələnə qədər dağılıblar.