İlkər Başbuğ: "Hərbi Akademiyaları ləğv etmək ordunun damarını kəsməkdir"

Keçmiş baş qərargah rəisi, ordu generalı İlkər Başbuğ 15 iyul dövlət çevrilişinə cəhdlə bağlı maraqlı açıqlamalar verib.

Ölkə.Az Türkiyə mediasına istinadən xəbər verir ki, o, 15 iyul hadisələrinin hərbi çevriliş olmadığını, sadəcə orduya sızmış Gülən tərəfdarlarının baş qaldırması, qiyamı kimi qiymətləndirib.

General çevriliş cəhdinin arxasında 3 qrupun dayanmasına diqqət çəkib. 2002-2010-cu illərdə Türk Silahlı Qüvvələrində FETÖ üzvləri ilə bağlı heç bir məlumat almadığını söyləyən Başbuğ baş qərargah rəisi olduğu müddətdə Ərdoğana Fətullahçılar barədə məlumat verdiyini söyləyib. Lakin o zaman Ərdoğan ona "Sən bunları çox böyüdürsən" deyə cavab verib.

İlkər Başbuğ hərbi akademiyaların bağlanmasını bir xəta kimi dəyərləndirib.

"Hətta Osmanlı padşahı Əbdülhəmidə qarşı hərbi qiyam baş verərkən hərbi akademiyalar bağlanmadı. Hərbi akademiyalar türk silahlı qüvvələri üçün həyati əhəmiyyət daşıyır. Onların ləğv edilməsi ordunun şah damarının kəsilməsi deməkdir", - deyə general bildirib.

İlhamə
Ölkə.Az