"Qazaxıstanda çətənənin becərilməsi leqallaşdırılacaq"

Qazaxıstan prezidenti Nursultan Nazarbayevin qızı Dariqa Nazarbayeva ölkədə çətənənin sənaye məqsədi ilə istehsalına başlanacağını bildirib

Ölkə.Az Qazaxıstan mediasına istinadən xəbər verir ki, Qazaxıstan baş nazirinin müavini, ölkə prezidentinin qızı Dariqa Nazarbayeva hökumət üzvlərinin müşavirəsində elmi tədqiqatların aparılması məqsədi ilə çətənə bitkisinin mübadiləsi ilə bağlı fəaliyyətə lisenziya verilməsində şəffaf mexanizm tətbiq edilməsini təklif edib.

Onun fikrincə, bu iş narkotik maddələrə nəzarət üzrə beynəlxalq komitə ilə sıx əməkdaşlıq şəraitində həyata keçirilməlidir.

O, bildirib ki, Qazaxıstanda kənd təsərrüfatı məqsədi iə Cənubi Qazaxıstan, Almata, Qaraqanda və Şimali Qazaxıstan vilayətlərində çətənə toxumları səpilib. Məhsul çətənənin emal texnologiyasının işlənib hazırlanması üçün Almaniya, ABŞ, Çin və Belçikaya göndəriləcək.

Prezidentin qızı çətənə kolunun kağız, tekstil və ərzaq sənayesində istifadəsinə yararlı olduğunu, ondan kağız istehsalı üçün sellülozanın alınmasının mümkünlüyünü və bununla da ölkənin kağız idxalından asılılığının azala biləcəyini söyləyib. Onun sözlərinə görə, çətənənin sənaye məqsədi ilə istehsalı dövlətin ciddi nəzarəti altında həyata keçiriləcək.

İlhamə
Ölkə.Az