Üzərində partlayıcı ilə tutulan uşaqdan tükürpədici etiraf
İraqın şimalında yerləşən Kərkük vilayətində dünən üzərində partlayıcı maddələrlə ələ keçirilən azyaşlı uşaq, onun maskalı şəxslər tərəfindən qaçırıldığını və üzərindəki partlayıcı qurğunu insanların sıx olduğu bir yerdə partlatması üçün geyindirildiyini deyib.
Ölkə.Az dünya KİV-ə istinadən xəbər verir ki, ələ keçirildiyində «Barselona» klubunun məşhur futbolçusu Lionel Messinin adının yazıldığı bir mayka geyinən həmin uşağın Musuldan qaçırıldığı deyilir. Kərkük kəşfiyyatından bir şəxs uşağı tutduqları zaman onun dayanmadan ağladığını və terror hadisəsi törətməsi üçün məcbur edildiyini qeyd edib.
Kərkük polis rəisi Albay Hattab Ömər isə dünən keçirdiyi mətbuat konfransında tutulan uşağın İŞİD-çi olduğunu bildirmişdi.
İraq kürdlərinə məxsus olduğu bilinən «Rudaw» saytının xəbərində isə ələ keçirilən uşaq polislərə terror hadisəsini həyata keçirmə tapşırığını atasından aldığını deyib.
