Dünyanın ən böyük hava gəmisi İngiltərədə qəzaya uğradı

Dünyanın ən böyük hava gəmisi olan "Airlander 10" İngiltərədə test uçuşu zamanı qəzaya uğrayıb.

Ölkə.Az Rusiya KİV-lərinə istinadən xəbər verir ki, hava gəmisini istehsal edən "Hybrid Air Vehicles" şirkətindən verilən məlumata görə, qəza nəticəsində xəsarət alan olmayıb.

Drijabl teleqraf dirəyinə dəyərək yerə çırpılıb. Bu zaman yalnız pilot kabinəsinə ziyan dəyib. Bu, drijablın ikinci sınaq uçuşu idi. Hər iki sınaq Londondan 73 km. şimalda Kardinqton hava limanı yaxınlığında keçirilib.

"Airlander10" - helikopter, təyyarə və drijablın hibritidir. Heliumla doldurulmuş gəminin uzunluğu 92 metr təşkil edir. O, 2 həftə ərzində havada qala bilər. Hibrid drijabl təyyarədən daha az yanacaq istifadə edir, yükgötürmə qabiliyyəti isə drijabla nisbətən daha çoxdur. Aparat 4,9 km yüksəkliyə qalxa və saatda 148 kilometr sürətlə uça bilər.

"Airlander10" kommersiya məqsədi ilə yaradılıb.

İlhamə
Ölkə.Az