Amerika Universitetinə hücum etmiş terrorçular öldürülüb

Əfqanıstan Təhlükəsizlik Qüvvələrinin əməkdaşları Kabuldakı Amerika Universitetinə hücum etmiş silahlı şəxsləri zərərsizləşdirib.

Ölkə.Az Rusiya KİV-lərinə istinadən xəbər verir ki, bu barədə yerli polis idarəsindən məlumat veriblər.

Xüsusi əməliyyat bütün gecə davam edib və sübh çağı başa çatıb. Hadisə yerində işləyən hüquq mühafizə orqanlarının əməkdaşları cinayət alətlərini toplayır və araşdırma aparırlar.

Verilən məlumatlara görə, silahlıların hücumu nəticəsində 12 nəfər, o cümlədən, bir mühafizəçi, 7 tələbə ölüb, 44 nəfər yaralanıb.

Ali məktəbdən 700 tələbə təxliyə edilib.

Xəbər verildiyi kimi, dünən gecə 1700 tələbənin təhsil aldığı Amerika Universitetinə dünən axşam yaraqlılar soxulub. Onlar binaya girməzdən öncə partlayış törədiblər. Bir çox tələbə ehtiyat qapı vasitəsi ilə binanı tərk edə bilib. Bir çoxları xilas olmaq üçün yuxarı mərtəbələrdən özlərini aşağı atıblar.

Terrorçular silahlı mühafizəçilərin müqavimətinə baxmayaraq binaya soxula biliblər.

Bu artıq avqust ayında terrorçuların Amerika Universitetinə ikinci hücumudur. Avqustun 7-də edilən hücum zamanı onlar Amerika və Avstraliya vətəndaşı olan iki professoru oğurlamışdılar.

Hadisəyə görə heç bir terrorçu qruplaşma məsuliyyəti üzərinə götürməyib.

İlhamə
Ölkə.Az