Kirsan İlyumjinovu Amerikaya buraxmadılar

Ölkə.Az "BBC"yə istinadən xəbər verir ki , Moskvadan Nyu-Yorka uçmaq istəyən Beynəlxalq Şahmat Federasiyasının (FİDE) prezidenti Kirsan İlyumjinovu təyyarəyə buraxmayıblar.

Bu barədə FİDE prezidenti özü məlumat verib.

"Delta" aviaşirkətinin əməkdaşı uçuşdan bir qədər öncə mənə bildirdi ki, mən ABŞ-a uça bilmərəm, aviaşirkət isə biletimin pulunu qaytarmağa hazırdır. Mən Vaşinqtona ABŞ Maliyyə Nazirliyinin mənə qarşı tətbiq etdiyi sanksiyalara şəxsən cavab vermək üçün getmək istəyirdim",- deyə o qeyd edib.

İlyumjinov bir gün öncədən jurnalistlərə verdiyi müsahibəsində ABŞ-a buraxılmamaq ehtimalının olduğunu vurğulamışdı.

"Delta" şirkətindən bildirilib ki, İlyumjinovun vizası qüvvədən düşmüş hesab olunur. FİDE rəhbərinə izah olunub ki, bu, aviaşirkətin qərarı deyil, vizası ləğv edilmiş şəxsin təyyarəyə buraxılması şirkətin böyük miqdarda cərimələnməsi ilə nəticələnə bilərdi.

Xatırladaq ki, ABŞ maliyyə Nazirliyi ötən il Rusiyada yaşayan 4 fiziki şəxsi Bəşər Əsəd rejimini maliyyələşdirməkdə və İŞİD-ə neft sazişləri ilə bağlı kömək etməkdə ittiham edərək onlara qarşı sanksiyalar tətbiq etmişdi. Həmin şəxslər arasında Kirsan İlyumjinovun da adı var. ABŞ Maliyyə Nazirliyinin əlində olan sənədlərə əsasən "Rus Maliyyə Alyansı" bankı Suriya hökuməti ilə maliyyə sazişləri bağlayıb. İlyumjinov sözügedən bakın ən böyük səhmdarlarından biridir.

İlhamə
Ölkə.Az