DİN başçısının müavini şaxtaçılar tərəfindən öldürüldü

Ölkə.Az Rusiya KİV-lərinə istinadən xəbər verir ki, Boliviyanın daxili işlər nazirinin müavini Rudolfo İlyanes onu girov götürmüş şaxtaçılar tərəfindən öldürülüb.

Bu barədə Boliviyanın daxili işlər naziri Karlos Romero məlumat verib. İlyanes şaxtaçılarla danışıqlara gedərkən əsir götürülüb.

"Nazir müavini qəddarcasına öldürülüb. Onu ölənə qədər döyüblər",- deyə nazir təəsüflə bildirib.

İlyanes girov götürüldükdən sonra şaxtaçıların tələbi ilə yerli radiostansiyaya müsahibə vermişdi. Nazir müavini bildirmişdi ki, şaxtaçılar onun əvəzində əmək qanunvericilyinə dəyişiklik edilməsini və danışıqlara başlanılmasını tələb edirlər.

56 yaşlı nazir müavini ölkənin paytaxtı La -Pas şəhərindən 160 km. məsafədə yerləşən Panduro şəhərində girov götürülüb. O, avtomobil yollarını bağlamış şaxtaçılarla danışıqlar aparmaq üçün Panduroya getmişdi. Boliviyada şaxtaçıların etiraz aksiyası iki həftədir davam edir. Artıq bir neçə dəfə polislə toqquşmalar olub. Bu toqquşmalarda iki polis öldürülüb, 17 polis yaralanıb.

Şaxtaçılar əmək haqqının artırılması, əmək şəraitinin yaxşılaşdırılması kimi tələblər irəli sürərək, ölkə prezidenti Evo Moralesi qeyri-liberal iqtisadi kurs yürütməkdə ittiham edirlər.

İlhamə
Ölkə.Az