Kerri və Lavrovun 12 saatlıq görüşündə nəticə nə oldu?

Ölkə.Az Rusiya KİV-lərinə istinadən xəbər verir ki, Rusiya XİN başçısı Sergey Lavrov və ABŞ dövlət Katibi Con Kerrinin Cenevrədə keçirilən görüşünün nəticəsiz başa çatdığı elan edilib. Danışıqlar zamanı Suriya böhranı müzakirə olunub.

Fasilələr də daxil olmaqla görüş 12 saat davam edib.

Dünən xəbər verilmişdi ki, Rusiyanın xarici işlər naziri Sergey Lavrov, ABŞ dövlət katibi Con Kerri və BMT-nin Suriya üzrə xüsusi nümayəndəsi Staffan de Misturanın Suriya böhranının müzakirəsi üzrə görüşü dayandırılıb.

Kerrinin danışıqlar gedən otelin binasını naməlum səbəbdən tərk etdiyi bildirilmişdi. Suriya böhranı üzrə danışıqlar əvvəlcə Kerri və Lavrov arasında nəzərdə tutulsa da, sonradan müzakirələrə Mistutra da qoşulub. Görüş bağlı qapılar arxasında keçirilib.

Suriya böhranı məsləsində ABŞ silahlı müxalifət qüvvələrini, Rusiya isə Bəşər Əsəd hakimiyyətini dəstəkləyir. Kerri və Lavrovun arasında danışıqların əsas mövzusu Suriyada hərbi əməliyyatların kordinasiya edilməsi idi.

Rusiya XİN-in mətbuat xidmətinin məlumatına görə, danışıqlarda yekun nəticə əldə edilməyib və bir çox böyük problemlərə dair ortaq məxrəcə gəlmək mümkün olmayıb. Rusiya və ABŞ Suriyada atəşkəs elan edilməsinə dair daha öncə razılıq əldə etsələr də, bu saziş kağız üzərində qalmış, suriyalıların isə atəşkəs elan edilməsindən xəbəri belə olmamışdı.

Kerri və Lavrovun son görüşündə bu sazişi real olaraq həyata keçirmək üçün razılıq əldə edilməli idi. Lakin verilən bəyanata əsasən, hələlik Suriyada silahlar susmayacaq.

İlhamə
Ölkə.Az