ABŞ kürdlərin müstəqillik planlarını dəstəkləmədi

ABŞ dövlət katibi Con Kerri ilə Rusiyanın Xarici işlər naziri Sergey Lavrovun Cenevrədə keçirilən görüşündə Vaşinqtonun kürdlərə Suriya daxilində müstəqillik verilməsinin tərəfdar olmadığı vurğulanıb.

Ölkə.Az Rusiya KİV-lərinə istinadən xəbər verir ki, Con Kerri deyib ki, ABŞ vahid Suriya dövlətinin bərpa edilməsinin tərəfdarıdır.

"Biz kürdlərə müstəqillik verilməsini dəstəkləmirik. Kürdlərlə bağlı məsələnin Türkiyə üçün nə dərəcədə həssas olduğunu yaxşı başa düşürük",- deyə amerikalı siyasətçi qeyd edib.

Buna cavab olaraq Sergey Lavrov söyləyib ki, kürdlər Suriya dövlətinin bir hissəsi olmalıdır.

Qeyd edək ki, hər iki ölkənin xarici siyasət idarəsi rəhbərlərinin Cenevrə görüşü nəticəsiz başa çatıb. Tərəflər bəzi məqamlar üzrə qaranlıq qalan məsələlərə aydınlıq gətirildiyini bildirsələr də, bir çox əsas problemlərin həll olunmamış qaldığını bəyan ediblər.

İlhamə
Ölkə.Az