Rza Zərrab məhkəmədə hakimin dəyişməsini tələb etdi

ABŞ-da həbsdə olan Azərbaycan əsilli iş adamı, müğənni Ebru Gündəşin əri Rza Zərrab məhkəməyə qarşı gözlənilməz tələb irəli sürüb.

O, məhkəməyə sədrlik edən hakimin başqası ilə əvəz olunmasını tələb edib. Reza Zərrabın vəkilləri məhkəmə ərəfəsində Türkiyəyə səfər etmiş amerikalı hakimin tərəf tutması iddiasını irəli sürüblər.

Qeyd edək ki, Rza Zərrab çirkli pulların yuyulması, ABŞ-ın İrana qarşı sanksiyalarını pozmaq kimi maddələrlə ittiham olunur.

Zərrabın vəkilləri məhkəməyə təqdim etidkləri iddianamədə hakim Riçard Bermanın 2014-cü ilin may ayında İstanbulda təşkil edilən "Ədalət və Hüquq Dövləti" adlı beynəlxalq simpoziuma qatıldığını bildiriərək "araşdırmalarımıza görə, Türkiyədə son günlərdə hərbi çevriliş cəhdindən sonra ortaya çıxan bəzi qaranlıq məqamlar fonunda hakimin bəzi qüvvələrin təsiri altına düşməsini ehtimal edirik. Zərrab bu səbəblə hakimin dəyişdirilməsi tələbini irəli sürür",- deyə ərizədə bildirilib.

Zərrabın vəkilləri hakim Bermanın simpoziumdan sonra türk mediasına verdiyi müsahibə və reportajlarda Zərraba qarşı qərəzli açıqlamalar verdiyini vurğulayırlar.

Nyu-Yorkda aprel ayında keçirilən ilk məhkəmə iclasında hakim Berman öz çıxışına İstanbulda qatıldığı simpozium barədə məlumat verməklə başlamışdı. Zərrabın vəkili Benjamin Brahman onun İstanbulda tədbirə qatılmasının hakimə təsir edəcəyini söyləmişdi.

Rza Zərrabın cinayət işi ilə bağlı növbəti məhkəmə iclası sentybarın 6-da keçiriləcək.

İlhamə
Ölkə.Az