Almaniya ordusu suriyalı qaçqınlara tikinti işini öyrədəcək

Ölkə.Az "BBC"yə istinadən xəbər verir ki, Almaniya Silahlı Qüvvələri suriyalı qaçqınlara tikiniti işinin öyrədilməsi üzrə pilot layihəni həyata keçirməyə başlayıb.

Almaniyanın müdafiə naziri Ursula fon der Lyayen və Almaniya Federal Məşğulluq Agentliyinin direktoru Frank Yurqen Vayze bu gün layihəyə rəsmi start veriblər.

Təlim prosesi 12 həftə davam edəcək. Bu müddət ərzində hərbi ekspertlər suriyalı qaçqına mühəndislik və tikinti işinin əsaslarını öyrədəcəklər.

Almaniya rəhbəliyi hesab edir ki,bu bacarıq və vərdişlərin suriyalı qaçqınlara vətənlərinə dönərkən lazım olacaq. Müdafiə naziri Lyayen söyləyib ki, Suriyanın bərpa olunması üçün yalnız tikinti materiallarına deyil, müxtəlif bilik və bacarıqlara sahib insanlara da ehtiyac olacaq.

"Hətta qaçqınlar öz ölkələrinə qayıtmaq istəməslər belə, Almaniyada onlara ixtisaslı işçilər kimi tələbat olacaq", deyə o əlavə edib.

Ötən il Almaniya bir milyondan artıq qaçqın qəbul edib. Bu il qaçqın axınının 300 min nəfərə qədər azalacağı ehtimal edilir.

Əvvəllər Almaniya hökuməti Yaxın Şərqdən gələn qaçqınların ölkənin ixtisaslı kadrlara olan tələbatını ödəyəcəyini düşünürdü.

Lakin miqrant axını ölkədə cinayətkarlıq səviyyəsinin artmasına səbəb oldu. Buna görə də, Almaniya cinayətkar miqrantlar üçüb deportasiya prosedurunu sadələşdirmək qərarına gəlib.

İlhamə
Ölkə.Az