"Heç kəs Türkiyəyə kiminlə döyüşəcəyi barədə göstəriş verə bilməz"

Ölkə.Az "Anadolu" agentiyinə istinadən xəbər verir ki, Türkiyənin Avropa İttifaqı məsələləri üzrə naziri və Avropa İttifaqı ilə danışıqlar aparan nümayəndə heyətinin rəhbəri Ömər Çelik bu gün verdiyi müsahibəsinə bir sıra aktual məsələlərə toxunub.

"Heç kim Türkiyəyə hansı terror təşkilatı ilə mübarizə aparıb-apara bilməyəcəyi barədə göstəriş verə bilməz. Bəziləri yalnız İŞİD-i özlərinə təhlükə hesab edirlər, PYD isə onlara düşmən deyil. Həm İŞİD, həm PYD Türkiyənin düşmənidir", deyə nazir vurğulayıb.

Ankaranın sentyabr ayında Aİ ilə qaçqınların yerləşdrilməsinə dair sazişi dayandırıb-dayandırmayacağına dair sualı nazir belə cavablandırıb:

"Türkiyə martın 18-dən bu sazişə əməl etməyə başlayıb. Aİ ilə viza rejiminin liberallaşdırılmasının dəqiq vaxtının açıqlanması readmissiya haqqında sazişin yerinə yetirilməsinə kömək edəcək. Hazırda biz terrorçuluqla mübarizə və digər qanunlara düzəlişlər edə bilmərik. Lakin Aİ daxilində müəyyən mexanizm yaradılarsa bu məsələyə yenidən baxmaq olar. Türkiyə bu öhdəliyi üzərinə götürə bilər. Viza rejimin liberallaşdırılmasına bu yolla zəmanət verilə bilər. Lakin hazırda Türkiyə bu qanunu dəyişə bilməz, çünki eyni zamanda 5-6 terror təşkilatı ilə mübarizə aparır. Əgər Hələb və Şimali Afrikada vəziyyət kəskinləşərsə, miqrasiya dalğası indikindən 2-3 dəfə çox olacaq. O zaman Cənab Yunker və bizim digər dostlarımız baş verənlərə görə Avropa xalqlarına cavab verməli olacaqlar", deyə Çelik vurğulayıb.

İlhamə
Ölkə.Az