İslam Kərimov dəfn edildi
Özbəkistanın mərhum prezidenti İslam Kərimov Səmərqəndin mərkəzində yerləşən Registan meydanında təşkil edilən vida mərasimindən sonra dəfn edilib.
Ölkə.Az yerli KİV-lərə istinadən xəbər verir ki, İslam Kərimov Şahi-Zinda adlı qədim məzarlıqda, valideynlərinin yanında dəfn olunub.
Onun nəşini qohumları və vətəndaşlar meydandan məzarlığa çiyinlərində aparıblar. Özbəkistan prezidentini son mənzilə aralarında xarici nümayəndə heyətlərinin də olduğu minlərlə insan yola salıb.
Dəfn mərasimində Azərbaycandan Milli Məclisin sədri Oqtay Əsədovun rəhbərliyi ilə nümayəndə heyəti də iştirak edib.
Qeyd edək ki, Özbəkistan hökuməti və parlamenti İslam Kərimovun ölümü ilə bağlı dünən rəsmi məlumat yayıb.
Ölkədə bu gündən 3 günlük matəm elan olunub.
İslam Əbdülqəni oğlu Kərimov 1938-ci ildə Səmərqənddə anadan olub. O, 1989-cu ildən Özbəkistana rəhbərlik edirdi.
