“Tayms-skverdə öpüş” fotosundakı tibb bacısı vəfat edib
ABŞ-ın Virciniya ştatında “Tayms-skverdə öpüş” fotosundakı tibb bacısı Qreta Fridman dünyasını dəyişib.
92 yaşlı Fridman cümə axşamı, sentyabrın 8-də, Riçmond şəhər xəstəxanasında vəfat edib. Mərhumun oğlu Coşua Fridmanın sözlərinə görə, son vaxtlar onun anası bir sıra xəstəliklərdən, o cümlədən, pnevmoniyadan əziyyət çəkirdi. Qadın Arlinqton qəbiristanlığında ərinin yanında dəfn ediləcək.
“Tayms-skverdə öpüş”, həmçinin “Tayms-skverdə Yaponiya üzərində qələbə günü” və ya “Dənizçi tibb bacısını öpür” adları ilə tanınan foto 14 avqust 1945-ci ildə Alfred Eyzenştedt tərəfindən Nyu-Yorkda əhalinin İkinci dünya müharibəsinin başa çatmasını qeyd etməsi zamanı lentə alınıb. Bir həftə sonra foto “Life” junalında dərc olunub və XX əsrin ən məşhur fotoşəkillərindən birinə və Roma-Berlin-Tokio oxu üzərində qələbənin simvoluna çevrilib. (oxu.az)
