67 yaşlı şahzadə maşını ilə maralı vurdu
Uels şahzadəsi Çarliz “Audi A4 Allroad Estate” markalı avtomobili ilə maralı vurub.
İnsident bir neçə gün öncə Şotlandiyada Balmoral iqamətgahının yaxınlığında baş verib. Bu barədə “The Daily Mirror” qəzeti şahzadəyə yaxın mənbəyə istinadən yazıb.
Qəzet yazır ki, şahzadə II Yelizavetanın böyük oğlu, 67 yaşlı Çarliz xəsarət almasa da, maşını ciddi ziyan görüb.
“Çarliz diqqətli sürücüdür. Bəzən marallar yola anidən çıxırlar və o anda hər hansı bir hadisənin qarşısını almaq qeyri-mümkün olur”, - deyə mənbə bildirib.
Qeyd edək ki, Böyük Britaniyada yol hərəkəti qaydalarına görə, maralı vurduqdan sonra maşını saxlamaq və ya bu barədə polisə məlumat vermək məcburiyyəti yoxdur. (qafqazinfo)
