Şimali Koreyada həbs olunan ABŞ vətəndaşı buraxıldı

Şimali Koreyada həbsdə saxlanılan 3 ABŞ vətəndaşından biri, 56 yaşlı Cefri Foul sərbəst buraxılıb

Ölkə.Az xəbər verir ki, Şimali Koreyada həbsdə olan ABŞ vətəndaşı sərbəst buraxılıb. Sərbəst buraxılan 56 yaşlı Cefri Foul ölkədə saxlanılan 3 ABŞ vətəndaşdan biri idi.

Sentyabr ayında turist vizasıyla Şimali Koreyaya gedən və bir otelə Xristianlığın müqəddəs kitabı olan İncili buraxdığı üçün həbs olunan Foul təxminən 6 aydır həbsdə idi. Missionerlik ittihamı ilə 6 ay boyunca qapalı saxlanılan Foul evinə qayıdacaq.

Şimali Koreyanın KCNA xəbər agentliyi xəbər verir ki, qərar ABŞ prezidenti Obamadan gələn tələblərin ardından qəbul edilib.

Ağ Evdən verilən məlumata görə, Şimali Koreyada tutulan digər iki ABŞ vətəndaşı ilə bağlı da işlər davam etdirilir.

2012-ci ildə həbs olunan 46 yaşındakı Kennet Bay oxşar bir iddia ilə 15 il məcburi iş cəzasına təhkim edilib. Digər ABŞ əsilli əsir Metyu Miller eyni düşərgədə 6 illik cəza alıb.

Rəşid Mustafazadə

Ölkə.Az