Belarusiya Rusiyanın sözünü yerə salmadı

Belarusiya Rusiyanın xahişi ilə Çernoqoriyadan ətin idxalına qadağa qoydu.

Ölkə.Az Rosbalt agentliyinə istinadən xəbər verir ki, Belarusiya Çernoqoriyadan gələn ət məhsullarına müvəqqəti idxal qadağası qoydu. Belarusiyanın Kənd təsərrüfatı nazirliyinin qida və veterinariya nəzarəti departamentindən bildirilib ki, bu addım Rusiyanın xahişi əsasında atılıb.

"Müvəqqəti məhdudiyyətlər Rusiyanın Kənd təsərrüfatı nazirliyinin məlumatı əsasında tətbiq olunub. Bu məlumat Çernoqoriyanın heyvan mənşəli məhsullar istehsal edən şirkətlərində aparılan yoxlamalar nəticəsində təsdiq olunub", - deyə Belarusiyanın nazırliyinin rəsmi məlumatında qeyd olunur. Qeyd olunur ki, məhdudiyyətlər iri və xırda buynuzlu heyvanların ət və ət məhsulları, habelə donuz məhsullarını əhatə edəcək.

Xatırladaq ki, 22 oktyabrda Rusiyada Çernoqoriyadan gələn məhsullara qadağanın qoyulacağı ilə bağlı məlumatlar yayılıb. Məhdudiyyətlər bavropa istehsallı məhsulların təkrar ixrac edilməsi ilə bağlı olub.

Rəşid Mustafazadə

Ölkə.Az