\"Kurtlar Vadisi Pusu\" hərbi çevrilişdə günahkardırmı?

Kurtlar Vadisi Pusu serialını istehsal edən "Pana Film" şirkəti ilə bağlı istintaq başlayıb.

Ölkə.Az xəbər verir ki, Türkiyə Patentləşdirmə İnstitutu şirkət tərəfindən 15 iyuldan əvvəl "Kurtlar Vadisi Darbe" markası üçün müraciət edildiyini bildirib. Dövlət qurumu bu məsələ ilə əlaqədar olaraq prokurorluğa şikayət edib. Məsələ ilə əlaqədar olaraq istintaqa start verilib.

"Pana Film" şirkətinin nümayəndəsi Ali Çavuşoğlu cari ilin may ayının 24-ü Türkiyə Patentləşdirmə İnstitutuna müraciət edərək "Kurtlar Vadisi Darbe" ifadəsini patentləşdirmək istəyib. Şirkətin müraciəti müzakirə edilərkən Türkiyədə məlum hərbi çevriliş baş verib. Bu səbəbdən İnstitut müraciəti rədd edib və prokurorluğa müraciət edib.

Qeyd edək ki, məşhur serial ilə yaranan qalmaqal neçə gündür ki davam edir. Bir müddət əvvəl bir televiziya verilişində də "Kurtlar Vadisi Pusu" serialı 70-ci seriyadakı qəbiristanlıq səhnəsinə görə ciddi tənqid edilmişdi.

Dünən isə başqa bir verilişdə serialın iyun ayında yayımlanan 299-cu seriyasına diqqət yönəldilib. 15 iyul hərbi çevrilişə cəhdin İstanbuldakı Boğaz körpüsündən başlandığı və serialda bu məkan ilə əlaqəli qəribə dialoqların olduğu bildirilib.

Hikmət
Ölkə.Az