Dünyanın canlı izlədiyi müharibədə nələr baş verir?

Dünyanın nəzəri İraqa çevrilib. Beynəlxalq xəbər agentlikləri və media qurumları Mosuldan gələn son dəqiqə xəbərlərini diqqətlə təqib edirlər.

Ölkə.Az Türkiyə mediasına istinadən xəbər verir ki, ABŞ Müdafiə Nazirliyinin mətbuat katibi Piter Kuk böyük Mosul əməliyyatının ikinci günü başlayanda vacib açıqlamalar verib.

Pentaqonun mətbuat katibi İraq silahlı birləşmələrinin də yer aldığı əməliyyatda İŞİD-in mübarizə aparıb-aparmayacağının bilinmədiyi üçün əməliyyatın qeyri-müəyyən vaxtda davam edəcəyi barədə xəbərdarlıq edib.

Koalisiya qüvvələri bazar ertəsi səhər saatlarından etibarən şəhərə hücum etməyə başladılar. İŞİD İraqın ikinci ən böyük şəhəri sayılan Mosulu 2014-cü ilin iyun ayında işğal etmişdi.

Terror qrupunun lideri Əbubəkir əl Bağdadi də xilafəti elan etmək üçün bu şəhəri seçmişdi. Kuka görə bu səbəbdən şəhərin işğaldan təmizlənməsi simvolik xarakter daşıyır.

Vaşinqtonda keçirilən mətbuat konfransında çıxış edən Piter: "İlk əlamətlərə əsasən, İraq silahlı qüvvələri bu vaxta qədər olan hədəflərinə nail olub. Hətta ilk gün üçün təyin edilən təqvim gününü də qabaqlayıblar. Bu, İraq planına görə cərəyan edir. Amma hələ nəsə söyləmək tezdir. Düşmən burada seçim edəcək. Savaşıb-savaşmayacaqlarını görəcəyik", - dedi.

Pentaqon rəsmisi çıxışına belə davam edib: "Nə olsa da, iraqlıların bu işi həyata keçirməyə güclərinin çatacağına inanırıq və koalisya qüvvələri ilə onlara dəstək verməyə hazırıq".

İraq ordusu, peşmərgə silahlıları və sünni tayfalara mənsub döyüşçülərdən ibarət 30 minlik koalisiya ordusu bir neçə aylıq planlama və hazırlıq mərhələsindən sonra, dünən İŞİD-in İraqdakı ən vacib mərkəzi sayılan Mosula tərəf irəliləməyə başladı.

Qeyd edək ki, şəhərdə 4-8 min arasında İŞİD yaraqlısı var.

24 saat ərzində ən vacib hədəflər həyata keçirildi

Peşmərgə qüvvələri əməliyyatın ilk saatında bəzi kəndləri ələ keçirdi. Dünən axşam saatlarında 200 kv kilometr və 9 kəndin işğaldan təmizlənməsi xəbəri ilə ən vacib hədəflərin həyata keçirildiyi açıqlandı.

Dünən Peşmərgə Komandanlığının verdiyi bəyanata əsasən, saat 20:00 radələrindən Ərbil-Mosul yolu nəzarətə götürülüb.

İŞİD-ə qarşı həyata keçirilən əməliyyatda ABŞ tərəfindən iştirak edən general-mayor Stefen Taunsend əməliyyata dair bunları söyləyib:

"İraqın ikinci ən böyük şəhəri Mosulu işğaldan azad etmə əməliyyatı yəqin ki bir neçə həftə davam edəcək. Bəlkə də daha çox vaxt lazım olacaq. Bu isə müharibənin uzun və çətin olacağını göstərir. Fəqət iraqlılar bunun üçün hazırlanıb və biz də onların yanında olacağıq".

BMT isə Mosuldan qaçmağa çalışan vətəndaşlara "BMT-nin və yardım agentliklərinin olmadığı qərbə doğru getməyin" müraciətini edib.

Dünən axşam bir mətbuat konfransında iştirak edən BMT İraq İnsan Yardım Koordinatoru Lays Qreynd bildirib ki, Mosuldan qaçan insanlar şərqə, şimala və cənuba istiqamət götürsünlər. Bu ərazilərdə yardım qurumları insanları gözləyir.