Mosul əməliyyatında üçüncü gün

Mosulu İŞİD terrorçularından təmizləmək üçün həyata keçirilən əməliyyatın 3-cü günü terrorçuların sadə vətəndaşlardan qalxan kimi istifadə etdikləri üzə çıxdı.

Ölkə.Az xəbər verir ki, əməliyyat çərçivəsində İraq ordusu və peşmərgələr irəliləməkdə davam edir. Digər tərəfdən şiələr türkmənlərin yaşadığı Telaferə tərəf irəliləyən İraq ordusuna dəstək verəcəyini bildirib. Bu vəziyyət isə bölgədə məzhəb çatışması ehtimalını da gücləndirir. Mosul sakinləri isə İŞİD-çilər tərəfindən sadə vətəndaşlardan canlı qalxan kimi istifadə edildiyini bildirdilər.

Telefonla əlaqə saxlayan şəhər sakinləri 100-ə qədər ailənin şəhərin cənub və şərq istiqamətlərindən mərkəzə köç etdiyini bildiriblər. İŞİD yaraqlıları isə şəhərdən köçmək istəyənlərin qarşısını kəsir, onları yeni boşaldılan binalara yerləşdirirlər.

Gələn xəbərlərdən bir də məlum olub ki, Avstraliya İŞİD-ə qarşı keçirilən əməliyyat çərçivəsində Mosula humanitar yardım göndərəcək.

Ölkənin xarici işlər naziri Culi Bişop nazirliyin rəsmi səhifəsində Mosula 10 milyon dollarlıq humanitar yardım aparılacağını bildirib.

Xatırladaq ki, İŞİD-ə qarşı keçirilən əməliyyatlarda Avstraliya da iştirak edir.

Hikmət
Ölkə.Az