Bu ölkədə internetə görə vergi alınacaq

Macarıstanda internetə görə vergi tələb olunacaq.

Ölkə.Az Deutsche Welle-yə istinadən xəbər verir ki, Budapeştdə internetdən vergi alınmasını nəzərdə tutan qanun layihəsinin əleyhinə irimiqyaslı etiraz aksiyaları keçirilib. Minlərlə iştirakçı Macarıstan hökumətindən bu qanunu rədd etməyi tələb ediblər.

"Macarıstanı azad edin" şüarı altında İqtisadiyyat nazirliyinin binası qarşısında yerləşən Yojef Nador meydanında toplaşan insanlar hesab edirlər ki, bu cür qanun layihəsi birbaşa insan hüquq və azadlıqlarının məhdudlaşdırılmasına xidmət edir.

Macar hökuməti internetdən istifadəyə görə vergi toplamağı nəzərdə tutub. Belə ki, 1 GB internetə görə 0,5 avro tələb olunacaq. Bu addım Macarıstanın büdcəsinə hər il 65 milyon avro qazandırmalıdır.

Xatırladaq ki, internetə görə verginin alınması təcrübəsi hələ heç bir avropa ölkəsində yoxdur.

Rəşid Mustafazadə

Ölkə.Az